المعافرة والتجديف بقوة مهما كانت شدة التيار من صفات الناجحين و اللي بتخلق التحفيز جواهم وبتخليهم قادرين يكملوا برغم الواقع المظلم, و المعنى ده هو أساس قاموس النجاح عندهم فبتلاقيهم بيعافروا ومش حاسين بالتعب.
ولكن للأسف بيجي لهم فتره لازم يكونوا مدركين تفاصليها قبل ما يغرقوا فيها , وهي فترة الشعور بإنهم حقيقي معيشين نفسهم في كذبة كبيرة وإنهم ولا حاجة, بيتبع الفترة دي في الغالب فقدان الرغبة على المعافرة والإستسلام لتلطيش الدنيا بل الإصرار على الإستسلام ده برغم تاريخهم المضيئ من وجهة نظر اللى حواليهم.
شعور مميت لما بيسكن جوا الإنسان بيخلق مشاعر ما تتوصفش ومايعرفهاش غير اللى جربها .
لكن لو حبينا نبسطه علشان يكون جرس إنذار للي ماجربوش علشان يلحق نفسه بسهولة:-
فهو شعور بيخلي الانسان مطفي, بيتحرك زى اللي بيخبط في الضلمة في مكان أول مرة يدخله, وقتها بيبقى إنسان هش مستباح نفسيا من أي شخص ,مهزوم بدون اى معارك, صيده لأي كلمة سواء صادقة أو كذابه, محتاج يترمي في حضن أي حد حتى لو هيموت بعدها .
لكن للأسف واللي لازم تعرفه كشخص سارقاك سكينة المعافرة وشايف نفسك بعيد عن اللى بنقوله, هي إن في بلادنا ياصديقي لما بيقع الشاطر بتكتر سكاكينه, أو أضعف الإيمان بيتساب واقع لحد مايبان له صاحب, لا اللي مسؤول عن راحته أو اللي مش مسؤول بيعبره .
هو مش كان عامل جدع وواقف لوحده؟ إزاي بقى دلوقتي بقى ضعيف كده ! .
هتسمع الجمل بقى امثال (ما اتعودناش عليك كده, إنت قوي وهتقدر) من بعض الأصدقاء حواليك وبعد كده بيمشوا ولسان حالهم ناقص يقول كتر خيرنا اننا بنواسيه هو حد فاضي لحد, ومنهم اللى هيشوف إنك شخص أوفر وبتكبر المسائل.
وقتها بيكون كل أمنيتك إنك تلاقي حد شبه معاملتك معاهم , حد كل يوم يطمن عليك حتى ولو هيشوف وصلت لفين درجة استسلامك.
لكن الواقع بيقول إنك مش هتلاقيه, لأنك شخص المعافرة مع نفسك ومع غيرك ديدنك واللي زيك مش كتير.
فريح نفسك وقتها, ودور على نفسك بنفسك لحد ما تخرجها من غياهب الاستسلام ده, وهقولك على شوية خطوات هتعملها زى الروبوت لحد ما تبقى جزء منك وتترد فيك الروح بالتدريج .
أولها حسن الظن المطلق في الله وتدابيره, واللجوء التام له والتجرد من حولك وقوتك, والتفتيش في الرسايل اللي بتجي لك كل يوم , يعني مثلا تغيير الجو المفاجئ ممكن تفسره رسالة أمل تزود حسن ظنك في مدبر الكون .
لما تلاقي قلبك بيبكي من اليأس احترم مشاعرك وماتقللش منها وما تأنبش نفسك عليها, اتفاهم معاه وطبطب عليه بكلمات زي ( لاتحزن إن الله معنا) ,واتشجع وعبر عن ألمك لحد هيفيدك ويحسن صورتك جواك مش من باب الشكوى وخلاص.
وسواء لقيت الحد ده أومالقتوش اجري راجع أجندة إنجازاتك السابقة علشان هي زادك في بداية رحلتك الجديدة بعد السقوط الحالي.
راجع حساباتك وأخطائك والاسباب اللى وصلتك للحالة دى وتدوينها.
خليك ممتن للفتره دى ,واعترف بإن راحة المحارب مش لازم تكون بعد الإنتصار, ممكن يكون الاستسلام نوع من أنواع الراحة ومداواة الطعنات, نوع من أنواع ترتيب اللي ساكن دولتك أو تخطيط للتخلص من احتلالهم.
مش كده؟😍😍
#ببساطه_اووووى
#قاعدة_عكسية_صنعها_جحود_البشر
#حب_نفسك
#امال_عطيه
تعليقات
إرسال تعليق